Gipaklaro sa pamunuan sa General Santos City Chamber of Commerce and Industry, Inc., nga wala nakig-away ang business community sa city government, kabahin sa ilahang baruganan nga angay’ng palu-agan na ang ginapatumang anti-Covid 19 protocol taliwala sa epekto sa ekonomiya sa dakbayan.
Sa usa ka pakighinabi ning Sabado, October 3, gipasabot ni GSCCCII president Elmer V. Catulpos, nga bugtong katuyuan lamang sa ilahang panawagan, ang panalipdan ang kaayuhan ug panginabuhian sa mga gagma’yng negosyante ug labaw sa tanan ang mga yanong residente sa GenSan.
Gihimo ni Catulpos ang pagpaklaro, human sa pamahayag usab ni City Mayor Ronnel Rivera nga mi-uyon ang business community sa pagpalawig sa ginapatumang General Community Quarantine (GCQ) status sa dakbayan.
“Mga reaksyon mismo sa mga tawo, sa page sa GenSan-LGU, sa interview gahapon kang mayor sa usa ka radio station, negative tanan ang reaksyon. Puwede gud nga dili namo ni dalon, pero GenSan Chamber as a big brother to the community, nakakita ta nga looy kaayo ang tao ba, gutom na ang katawhan nato,” ang pagpasabot sa presidente sa Chamber.
Taliwala niini, subling nanawagan ang opisyal ngadtu sa city government nga i-rekonsidera ang ilahang panawagan nga ibalik na sa modified GCQ ang siyudad, subay usab sa nahimong rekomendasyon mismo sa National-IATF ug deklarasyon sa Pangulong Rodrigo Duterte.
“Kanang, kinasing-kasing ni nga hangyo, sa amoa. Kanang sa mga tao, katong akong gi-ingon nga kanang, grabe naman nga naay mga tao nga insensitive, nga bisan sa mga post ninyo, after sa mga interview, reaksyon sa mga tao negative kaayo, kay nagutman, kay nawad-an ug trabaho, consistent gihapon mo,” ang dugang pamahayag ni Catulpos. (photo courtesy by Brigada Group of Companies)
(Source: Aliw Gensan Facebook page)