Nakontrol dagiti serbisio kangrunaanna iti Out-patient Department ken limitado laeng dagiti sumrek iti Gov. Roque Ablan Senior Memorial Hospital (GRASMH) sipud nangrugi ti covid 19 pandemic.
Daytoy ti inadmitir ni Dr. Walbert Samonte, Officer in Charge iti Gov. Roque Ablan Senior Memorial Hospital kas maysa kadagiti inaramid da a ‘’contingency plan’’ tapno maliklikan iti panagwaras ti covid.
Inlawlawagna a no sumrek iti ospital, maala nga umuna ti health declaration/ general information ti maysa a pasiente sakbay a macheck up.
Maipan met I isolation room no adda iti respiratory symptoms ti pasiente idinto a dagiti non-respiratory ailment ket maiturong da iti Out Patient Dept.
Kunana a no aldaw iti Martes ken Biernes ket para laeng iti Pediatrics ken Obstetrics gynecology idinto nga iti aldaw met iti Lunes ken Huwebes iti internal medicine.
Iti met biang ti surgery, aglukat da laeng iti aldaw ti Miyerkules ken Sabado ngem saan a malimitaran gapu ta bassit met dagiti maoperar.
Nakalukat met iti Opthalmologist Dept. ti GRASMH iti aldaw ti Lunes, Martes ken Biernes, idinto nga iti Dental Dept. ket Lunes, Mierkulas ken Biernes ken ti Animal Bite ket aldaw ti Lunes ken Biernes.
Inlawlawag ni Dr. Samonte nga ar-aramiden daytoy ti GRASMH tapno masurot dagiti health protocols nga inyetnag ti gobierno nasional ken ti probinsia babaen ken ni Gob. Matthew Marcos Manotoc.
Nupay kasta, impasigurado ti Officer in Charge ti nadakamat a balay pagagasan a mataming amin dagiti maiserrek ken mapan agpakunsolta iti ospital ngem nasken a masurot dagiti pagalagadan tapno adayu ti mabalin a pannakaar iti infection ti virus. (OIC Rod G. Sadian, RPN DZRL Batac)
(Source: Task Force Salun-at)