Cebu City – Nakadawat og bag-ong suplay sa bakuna batok sa Covid 19 ang Central Visayas kagahapon.
Mikabat og 132 mil ka doses sa AstraZeneca ug 29,250 doses isip unang batch sa Pfizer’s BioNTech vaccines ang miabot sa Mactan Cebu International Airport (MCIA) nianang alas 8 sabuntag.
Gikan sa tugpahanan, gida dayon ang mga bakuna ngadto sa cold storage facility sa tugkaran sa Department of Health o DOH-7 sa Cebu City.
Si Dr. Mary Jean Loreche, tigpamaba sa DOH-7, miingon nga sagad sa bag-ong batch sa AstraZeneca vaccines gamiton alang sa second dose niadtong nakadawat na sa first dose sa samang brand.
Ang schedule sa second dose, matod ni Loreche, mo-due karong semanaha.
Gitataw usab ni Loreche nga ang kapin sa 29,000 ka doses sa Pfizer’s BioNTech, ibiyahe lang ug gamiton sa mga highly urbanized cities tungod sa temperature requirements nga moabot og negative 70 degrees Celsius.
Pagkakaron, aduna nay 396,210 ka doses batok sa COVID-19 ang rehiyon lakip sa miabot karong adlawa. (Jhon Tadlip/JTY)
(Source: DOH-7, photo courtesy of Radyo Pilipinas Cebu)
