Cebu City – Girekomendar sa Department of Education o DepEd 7 ang 50 ka tunghaang publiko sa Central Visayas nga ilakip sa pilot implementation sa limited face-to-face classes.
Si Dr. Salustiano Jimenez, Director sa DepEd-7, miingon nga ang unang batch sa implementation karong umaabot school year.
Bisag 50 ka slots ray gihatag sa Central Visayas, matod ni Jimenez, nag-andam silag 100 ka tunghaan sa maong modality.
Suma pa ni Jimenez, iya nang nabisitahan ang mga tunghaan nga gisugyot iapil sa limited face-to-face classes.
Gani, naabot na siyag Camotes ug Bantayan Island ug mao na poy iyang planong adtoon ang Bohol, Negros, ug Siquijor para pagsusi sa gisugyot nga ilakip sa limited face-to-face classes sanglit dinhi sa Central Visayas, 50 katunghaan ang gipangayo sa Central Office.
Ang mga tunghaan sa Central Visayas nga andam na sa unang batch sa face-to-face anaa sa mga nagkadaiyang lungsod sa Probinsya sa Sugbo, anaa sab sa Toledo, Bogo ug Syudad sa Carcar.
Ang maong mga tunghaan nakatuman na sa requirements sama sa resolution sa local government unit (LGU), resolution sa Parents Teachers Association (PTA) nga misugot sa limited face-to-face, ug suporta gikan sa DepEd division office. (Jhon Tadlip/JTY)
(News & photo courtesy of DepEd 7)