Nadakpan sa kapulisan ang usa ka lalaki nga giingong Top 2 Most Wanted sa tibuok probinsya tungod sa kasong murder atol sa pagserb sa warrant of arrest niadtong Hulyo 2, 2025 sa A. Soriano Street, Barangay Centro, Mandaue City.
Ang operasyon gipangulohan sa Criminal Investigation and Detection Management Unit sa Mandaue City Police Office (MCPO), pinasikad sa mando sa korte nga gipagula sa Regional Trial Court Branch 14 sa Cebu City niadtong Mayo 26, 2025. Walay piyansa nga girekomendar sa maong kaso.
Ang suspetsado, 31 anyos ug residente sa Barangay Ermita, Cebu City, kasamtangang gitanggong sa Police Station 6 samtang naghulat sa iyang presentasyon sa korte.
Ang kaso nga murder silotan og reclusion perpetua o hangtod 40 ka tuig nga pagkabilanggo.
Gipasidunggan ni Police Brigadier General Redrico A. Maranan, Regional Director sa PRO7, ang paspas ug epektibong aksyon sa MCPO ug misaad nga padayon ang ilang intelihensya ug koordinasyon aron masikop ang tanang wanted nga mga personalidad.
“Our intelligence monitoring and coordination are in full force to locate and apprehend wanted persons. Serving all standing warrants of arrest remains a top priority as we intensify our efforts to deliver justice and safeguard the communities we serve,” segon ni PBGEN Maranan.
Source: PRO7
I via Renante Socia Lada