Mikabat sa 4,733 ka mga tawo ang nadakpan ug kapin ₱522 milyon nga kantidad sa ilegal nga drogas ang nasakmit sa tibuok Central Visayas atol sa gipakusgang kampanya sa Police Regional Office 7 (PRO7) batok sa ilegal nga drogas sukad Enero hangtod Hunyo 2025.
Base sa report, 4,101 ka mga operasyon batok sa ilegal nga drogas ang gihimo sa PRO7 sa unang unom ka bulan sa tuig. Sa maong mga operasyon, nadakpan ang 238 ka high-value targets, 2,522 ka street-level targets, ug 1,973 ka bag-ong nailhan nga drug personalities.
Gikan sa mga operasyon, nasakmit ang 76,120.35 gramos sa shabu nga nagkantidad og ₱517.6 milyon, marijuana nga nagkantidad og ₱3 milyon, 250 gramos sa cocaine nga nagkantidad og ₱1.3 milyon, ug 60 ka tabletas sa ecstasy nga nagkantidad og ₱102,000.
Sumala ni PBGEN Redrico A. Maranan, Regional Director sa PRO7, ang kalampusan sa kampanya batok sa drogas resulta sa tinud-anay, han-ay, ug walay hunong nga paningkamot sa kapulisan.
Gidugang niya nga dili lang kapulisan ang angay nga mokupot sa responsibilidad sa pagsumpo sa drogas. Nangayo siya og suporta gikan sa publiko nga motabang ug mosumbong sa mga kalihokan nga may kalabotan sa drogas.
Misaad ang PRO7 nga ipadayon pa ang kampanya batok sa ilegal nga drogas sa ikaduhang bahin sa 2025, ug lig-onon pa ang koordinasyon sa mga ahensya sa gobyerno, LGUs, mga barangay, ug mga grupo sa katawhan aron mapakusog ang pagpugong, pagpangdakop, ug rehabilitasyon sa rehiyon.
Source: PRO7
I via Renante Socia Lada