Gipasiugda ni Presidente Ferdinand R. Marcos Jr. nga mas mapaspas na ang paghatag og ayuda sa mga komunidad nga maapektuhan sa kalamidad, atol sa iyang pagbisita sa gi-upgrade nga Visayas Disaster Resource Center (VDRC) sa Mandaue City, Cebu, sa Pebrero 26, 2026.
Sumala sa Presidente, ang pasilidad makatabang sa nasyonal nga kagamhanan nga direkta makahatag og family food packs ug uban pang ayuda sa mga lugar sa Visayas ug Mindanao nga maigo sa bagyo, linog, sunog, ug uban pang kalamidad.
Ang ₱117-milyon nga pag-upgrade sa mechanized production system sa VDRC makahimo na og hangtod 30,000 ka family food packs matag walo ka oras nga duty, mas paspas kaysa kaniadto.
Ang bag-ong makina adunay vacuum sealing system aron molungtad og dugay ang pagkaon ug malikayan ang pagkadaot o pagsulod sa mananap.
Matod ni Pres. Marcos, karon adunay 4 milyones ka food packs nga nakaandam sa bodega ug padayon pa ang produksyon hangtod molapas sa 5 milyones ang stock. Kung adunay hapit na ma-expire nga food packs, ipanghatag kini libre sa mga nanginahanglan.
Ang VDRC nagsilbi usab sa mga lugar nga adunay sunog ug mga lugar nga naapektuhan sa volcanic activity. Ang pagpalambo sa pasilidad kabahin sa direktiba sa Department of Social Welfare and Development (DSWD) nga masiguro ang dali ug igo nga paghatag og tabang sa mga biktima sa kalamidad.
Dugang pa, ang Visayas hub mosuporta sa serbisyo sa Luzon Disaster Resource Center sa Pasay City. Samtang adunay temporaryo nga hub sa Mindanao, gipahibalo sa Presidente nga magtukod og permanente nga Mindanao Disaster Resource Center sa Butuan City.
Sa tibuok nasud, adunay 17 ka mobile kitchens nga naghatag og init nga pagkaon sa mga evacuation center ug 16 ka mobile command centers aron mapalambo ang koordinasyon panahon sa kalamidad.
Sa pagbisita, gisuroy sa Presidente ang mga bodega sa raw nga materyales, storage sa food packs, ug ang manual ug mechanized production areas. Nasaksihan usab niya ang pagkarga sa mga food packs paingon sa mga DSWD field offices sa Iloilo City ug Butuan City aron andam sa paghatag og tabang kung gikinahanglan.
Source: PCO
I via Renante Socia Lada