Nadakpan sa Tracker Team sa Asturias Municipal Police Station ang usa sa mga Most Wanted Person sa probinsya niadtong Pebrero 23, 2026 sa Barangay Poblacion, Asturias, Cebu.
Ang nadakpan giila lamang sa alyas nga “Carl,” 17 anyos ug out-of-school youth nga residente sa maong lugar. Siya gidakop base sa Warrant of Arrest tungod sa kasong Statutory Rape. Ang warrant gi-isyu ni Hon. Judilyn Hugo Tapia-Menchavez, Presiding Judge sa Branch 8, Seventh Judicial Region sa Toledo City.
Wala usab girekomendar ang piyansa alang sa maong kaso. Sumala sa rekord sa kapulisan, nahitabo ang giingong insidente niadtong Mayo 2, 2025 sa usa ka balay sa Purok 2, Barangay Poblacion, Asturias. Ang suspetsado giila nga Top 7 Most Wanted Person sa lebel sa probinsya ug usa usab ka Most Wanted Person sa Asturias MPS.
Gipahigayon ang pagdakop pinaagi sa intelihensiya nga operasyon sa Tracker Team sa estasyon sa kapulisan.
Gidayeg ni Abubakar Udang Mangelen Jr., Provincial Director sa Cebu Police Provincial Office, ang kapulisan nga nagpatuman sa operasyon. Matod niya, padayon ang ilang kampanya batok sa mga wanted person aron masiguro nga maatubang sa hustisya ang mga adunay seryosong kaso ug mapalig-on ang kalinaw ug kaluwasan sa komunidad.
Sa pagkakaron, anaa na sa kustodiya sa kapulisan ang nadakpan samtang gihulat ang sunod nga legal nga proseso batok kaniya.
Source: CPPO
I via Renante Socia Lada