Gipahibalo sa National Grid Corporation of the Philippines (NGCP) nga ipatuman ang Yellow Alert sa Visayas Grid karong Hulyo 31, gikan sa 6:00 sa gabii hangtod 7:00 sa gabii.
Sumala sa datos alas 8:00 sa buntag, ang available nga kapasidad sa kuryente sa Visayas mao ang 2,564 megawatts (MW), samtang ang gilauman nga pinakataas nga konsumo o peak demand mao ang 2,321 MW.
Ang Yellow Alert tungod kay daghang power plants ang wala nag-operate o limitado ang produksiyon. Lakip niini ang wala pagdagan sa dagkong coal plants nga TVI 1 & 2 ug CEDC 1, ingon man ang emergency shutdown sa KSPC 1 kagahapon Hulyo 30 tungod sa boiler tube leak. Sa kinatibuk-an, 969 MW nga kapasidad sa kuryente ang dili magamit sa grid.
Ang Yellow Alert nagpasabot nga gamay na lang ang reserbang kuryente aron masiguro ang normal nga suplay kung adunay kalit nga problema sa transmission grid. Bisan pa niini, wala kini nagpasabot nga adunay automatic nga brownout, apan posible kini kung mosamot pa ang kakulang sa suplay.
I via Renante Socia Lada