Gipahibalo ni Cebu Governor Pamela Baricuatro ang plano sa pagtukod sa unang Physiotherapy ug Rehabilitation Center nga dumalaon sa Gobyerno sa Lalawigan alang sa mga Persons with Disabilities (PWDs). Ang maong pasilidad ipahimutang sulod sa giayo nga Wellness Center sa Provincial Capitol.
Ang maong sentro mahimong bag-ong opisina usab sa Provincial Disability Affairs Division (PDAD) aron mas mapalambo ang serbisyo ug suporta alang sa mga PWD sa tibuok lalawigan.
Atol sa selebrasyon sa Provincial PWD Month, naghatag ang Provincial Health Office og libreng konsultasyon medikal, blood sugar, uric acid ug cholesterol testing, lakip ang pagpanghatag og reading glasses ug multivitamins sa mga PWD.
Gipasiugda ni Gov. Baricuatro nga ang pagpanalipod sa katungod ug kaayohan sa mga PWD dili lamang angay sa usa ka bulan kondili kinahanglan ipadayon matag adlaw.
Gipahigayon usab ang panumpa sa bag-ong mga opisyal sa PWD Federation ug gipasidunggan ang mga migawas nga opisyal tungod sa ilang serbisyo.
I via Renante Socia Lada