Mainitong gidawat sa Gobyerno sa Lalawigan sa Sugbo, ubos sa pagpangulo ni Gobernadora Pamela S. Baricuatro ug pinaagi sa Cebu Provincial Tourism Office (CPTO), ang 292 ka Filipino-American nga miapil sa Very Important Pinoy (VIP) Tour 2026.
Sa ilang unang adlaw sa Sugbo niadtong Hulyo 17, gipailaila kanila ang nagkadaiyang mga tourist destination sa habagatang bahin sa probinsya.
Nasinati sa mga delegado ang mga sikat nga atraksyon sama sa canyoneering sa Badian, sardine run sa Moalboal, ug ang whale shark encounter sa Oslob.
Ang uban usab mibisita sa mga lungsod sa Boljoon, Argao, ug sa Heritage City of Carcar, diin ilang nasaksihan ang kasaysayan, kultura, ug mga lokal nga pagkaon sa Sugbo.
Nagpahigayon usab ang CPTO og VIP Bazaar sa Dusit Thani Mactan Cebu Resort aron ipakita ang mga dekalidad nga produkto sa Sugbo. Lakip niini ang mga lokal nga delicacies, sinina, handicrafts, ug uban pang produktong gihimo sa mga Sugboanon.
Ang Very Important Pinoy (VIP) Tour usa ka programa sa Department of Foreign Affairs (DFA) ug Department of Tourism (DOT) nga nagtumong sa pagdugtong pag-usab sa mga Filipino nga nagpuyo sa gawas sa nasod ngadto sa ilang kultura, kasaysayan, ug gigikanan pinaagi sa turismo.
Sumala sa CPTO, pinaagi sa maong programa, mas mailhan pa sa mga bisita ang katahom sa Sugbo ug ang mainiton nga pag-abiabi sa mga Sugboanon.
I via Renante Socia Lada