Gihimo sa CCLEX Bridge Management Board ang ikaduhang regular nga tigum niadtong Hulyo 17 sa opisina sa Cebu Cordova Link Expressway Corporation (CCLEC) sa Cordova, Cebu aron hisgutan ang kasamtangang operasyon sa CCLEX ug mga bag-ong proyekto sa imprastraktura.
Ang miting gipangulohan ni CCLEC President ug General Manager Engr. Allan Alfon. Mitambong usab isip mga miyembro sa board sila Cebu City Mayor Nestor Archival ug Cordova Mayor Cesar Suan.
Usa sa mga nag-unang gihisgutan mao ang gisugyot nga CCLEX-CSCR Interchange Project. Sumala ni Mayor Archival, gilauman nga mapaspasan ang maong proyekto aron makatabang sa pagpaayo sa dagan sa trapiko sa South Road Properties (SRP).
Kon matuman ang proyekto, magbutang kini og bag-ong entry ug exit ramps nga magkonektar sa CCLEX ug Cebu South Coastal Road (CSCR).
Tungod niini, mas sayon ug direkta na ang agi sa mga motorista paingon ug gikan sa downtown ug uptown sa Metro Cebu, ug maminusan usab ang paggamit sa U-turn slot sa F. Vestil-Talisay.
Gihisgutan usab sa board ang kahimtang sa gisugyot nga CCLEX-LLEX Interconnection Project ug uban pang mga plano alang sa pagdumala ug padayon nga pagpalambo sa CCLEX.
I via Renante Socia Lada