Nagpadayon ang Cebu City Disaster Risk Reduction and Management Office (CCDRRMO) sa paghatag og tabang ug pagresponde sa nagkadaiyang emerhensiya gikan Hulyo 2025 hangtod Abril 2026. Kabahin kini sa mga nahimo sa unang tuig sa administrasyon ni Cebu City Mayor Nestor Archival.
Atol sa Kalag-Kalag 2025, nagbutang ang CCDRRMO og mga medical assistance station ug nagdeploy og responder sa daghang sementeryo sa siyudad aron maseguro ang kaluwasan sa mga namisita. Gipamutol usab ang delikadong mga kahoy ug gipahinumdoman ang publiko sa mga emergency hotline.
Sa pag-abot sa Bagyong Tino, gi-aktibo sa opisina ang Emergency Operations Center ug nagpadayon sa pagmonitor sa panahon. Gipa-evacuate usab ang mga residente sa pipila ka barangay aron malikayan ang peligro sa baha ug kusog nga hangin. Human sa bagyo, naglimpyo sila sa natumbang nga mga kahoy ug basura, nagpatuman og search and rescue operations, ug naghatag og tubig sa mga apektadong lugar.
Sa panahon sa Pasko ug Sinulog 2026, nagdeploy usab ang CCDRRMO og mga responder ug medical teams sa mga simbahan, dagkong kalihokan, ug ruta sa Sinulog aron andam motabang sa bisan unsang emerhensiya. Mitabang usab sila sa search and rescue operation atol sa insidente sa trash slide sa Barangay Binaliw.
Atol sa Semana Santa 2026, nagbutang ang opisina og incident command post ug medical teams sa mga simbahan, pantalan, bus terminal, ug uban pang lugar nga daghang tawo aron maseguro ang kaluwasan sa publiko.
Base sa rekord sa CCDRRMO gikan Hulyo 2025 hangtod Abril 2026, nakatubag sila sa 1,749 ka aksidente sa sakyanan, 1,007 ka kaso sa kalit nga pagkaluya o pagsakit sa lawas, 356 ka pagdala sa pasyente sa ospital, 255 ka sunog, 26 ka insidente sa pagpamusil, ug 13 ka pagdahili sa yuta, lakip ang uban pang matang sa emerhensiya.
Sumala sa CCDRRMO, nagpadayon ang ilang paningkamot aron masiguro ang kaluwasan sa mga Sugbuanon sa panahon sa mga kalamidad ug dagkong kalihokan sa siyudad.
📸 CCDRRMO
I via Renante Socia Lada