Nasikop sa kapulisan sa Toledo City ang usa ka dugay nang gipangita nga wanted person sulod sa halos 15 ka tuig, sa usa ka intelligence-driven operation nga gihimo niadtong Abril 3, 2026, alas 6:00 sa gabii sa Sitio Ylaya, Barangay Talavera.
Pinangunahan sa Philippine National Police (PNP) pinaagi sa Toledo City Police Station ang operasyon batok sa suspetsado nga adunay standing warrant of arrest sa kasong rape in relation to RA 7610, nga giisyu sa Regional Trial Court sa Toledo City ug walay piyansa.
Sumala sa mga otoridad, dugay na nga gipangita ang maong personalidad ug usa kini ka dako nga kalampusan sa kapulisan human sa dugay nga pagmonitor ug intelihensyang operasyon.
Ang suspetsado anaa na karon sa kustodiya sa Toledo City Police Station alang sa hustong proseso ug pag-turnover ngadto sa korte nga nag-isyu sa warrant.
Matud pa ni PLTCOL Rolando H. Barraquio, magpadayon ang paningkamot sa PNP sa pagdakop sa mga wanted persons aron masiguro ang kalinaw ug kahapsay sa komunidad.
Gipasiugda usab sa kapulisan ang ilang dedikasyon sa pagserbisyo sa publiko ubos sa kampanya nga “To Serve and Protect” ug sa tumong nga mapalig-on ang seguridad sa matag komunidad.
Source: Toledo City Police Station
I via Renante Socia Lada