Nasikop sa joint law enforcement operatives ang usa sa Top 4 Most Wanted Persons sa probinsya niadtong miaging adlaw, sa Purok 7, Katikan, Barangay Tapul, Talisay City, Cebu.
Ang suspetsado, nga nailhan sa alias nga “Joven,” usa ka 20-anyos nga lalaki, walay trabaho, adunay live-in partner, ug residente sa Purok 7, Katikan, Talisay City. Ang operasyon gihimo sa Joint Tracker Team sa Provincial Intelligence Unit (PIU), Cebu Police Provincial Office, kauban ang Talisay City Police Station, pinaagi sa intelligence-driven effort nga misangpot sa malampusong pag-implementar sa warrant of arrest batok sa suspetsado.
Gipasakaan ang suspetsado og tulo (3) ka kaso sa Rape ubos sa Paragraph 1(a), Article 266-A sa Revised Penal Code, nga gi-amendahan sa Republic Act 8353, ug walay girekomendar nga piyansa.
Nasayran nga nalambigit ang suspetsado sa sexual assault sa usa ka biktima nga nangayo og hustisya pinaagi sa pagsang-at sa kaso. Ang suspetsado gisultihan sa iyang constitutional rights sa pinulongang iyang nasabtan ug anaa karon sa kustodiya sa Talisay City Police Station samtang gi-andam ang pag-turnover sa korte nga nag-isyu sa warrant.
Gidayeg ni PCOL Abubakar Udang Mangelen Jr. ang mga nagpatuman sa operasyon ug gisiguro ang lig-on nga baruganan sa kapulisan batok sa krimen.
Ang maong kalampusan usa ka dakong tabang sa padayon nga paningkamot sa pagpakunhod sa kriminalidad ug sa paglig-on sa pagsalig sa publiko sa kapulisan, nga nagpamatuod nga ang Cebu dili dapit nga puy-anan sa mga nakalapas sa balaod.
Source: CPPO
I via Renante Socia Lada