Nadakpan sa kapulisan ang usa ka wanted person nga gipasanginlan og attempted homicide atol sa pagsilbi sa warrant of arrest sa Dumanjug niadtong miaging mga adlaw.
Gipahigayon ang operasyon sa tracker team sa Dumanjug Municipal Police Station sa usa ka barangay sa lungsod. Base sa warrant of arrest, dali nilang nakit-an ug nadakpan ang suspek nga walay nahitabong komosyon.
Matud sa kapulisan, gipahibalo sa suspek ang rason sa iyang pagdakop ug ang iyang mga katungod ubos sa balaod sa dihang gidakop siya. Giingon usab nga ang operasyon gihimo subay sa hustong legal nga proseso ug adunay kompletong dokumentasyon.
Si PCOL Abubakar Udang Mangelen Jr., Provincial Director sa Cebu Police Provincial Office, miingon nga padayon ang ilang kampanya batok sa mga wanted person sa probinsiya.
Matud pa niya, ang malampusong pagdakop nagpakita sa lig-on nga paningkamot sa kapulisan sa pagpangita ug pag-atubang sa mga tawo nga adunay kasong kriminal samtang gitahod gihapon ang ilang katungod ug ang due process.
Gipadayag usab sa CPPO nga ilang palig-onon pa ang manhunt operations sa tibuok probinsiya ug giawhag ang publiko nga motabang pinaagi sa pagreport sa nahimutangan sa mga wanted person aron mapadayon ang kalinaw ug kahapsay sa komunidad.
Source: CPPO
I via Renante Socia Lada