Nagpahigayon og meeting ang Cebu Police Provincial Office (CPPO) pinaagi sa Provincial Joint Peace and Security Coordinating Center (PJSCC) kagahapon Mayo 12, 2026 didto sa CPPO Command Center aron mas mapalig-on pa ang koordinasyon sa nagkalain-laing ahensiya sa gobyerno alang sa kalinaw ug seguridad sa probinsiya sa Cebu.
Ang maong tigom gipangulohan ni CPPO Provincial Director PCOL Abubakar Udang Mangelen Jr., uban ni COL Joel Benedict G. Batara sa Joint Task Group Cebu sa Philippine Army ug ni Capt. Jerome Y. Lozada sa Philippine Coast Guard nga girepresentahan ni LTJG Jay-R Alguidano, Commander sa Station Central Cebu.
Mitambong usab sa kalihokan si PLTCOL Jose Rovic A. Villarin, Deputy Provincial Director for Operations sa CPPO, mga opisyal sa command group ug quad staff, mga force commander sa 1st ug 2nd PMFC, mga hepe sa kapulisan sa nagkalain-laing lungsod, ug mga representante gikan sa NICA 7 ug PDEA Cebu Province.
Sa meeting, gihisgutan ang kasamtangang kahimtang sa kalinaw ug seguridad sa probinsiya, internal security operations, pagmonitor sa posibleng hulga sa terorismo, ug estratehikong deployment sa mobile forces.
Gipasiugda usab ang mga nahimo ug padayon nga programa ilawom sa National Task Force to End Local Communist Armed Conflict o NTF-ELCAC. Sumala sa mga opisyal, importante ang padayon nga panagtinabangay sa kapulisan, militar, ug ubang ahensiya aron masiguro ang kalinaw ug kaluwasan sa tanang Sugbuanon.
Matud pa sa CPPO, pinaagi sa lig-on nga intelligence sharing ug hiniusang aksyon, padayon nilang paningkamotan nga mapadayon ang malinawon ug luwas nga probinsiya sa Cebu.
Source: CPPO
I via Renante Socia Lada