Nagpahinumdom ang kapulisan sa publiko nga magmatngon ug mag-amping aron malikayan ang mga krimen pinaagi sa kampanya nga “Lock-Up Always.”
Sumala sa mga otoridad, importante nga pirmihong kandadohan ang mga pultahan, bintana, ug ganghaan bisan pa naa ra sa sulod sa balay. Gidasig usab ang tanan nga magmatngon sa ilang palibot ilabina sa daghang tawo o ngitngit nga lugar aron malikayan ang mga kawatan ug kriminal.
Gipasiugda usab sa PNP ang kamahinungdanon sa hayag nga palibot sa balay pinaagi sa pagbutang og suga sa gawas aron mapugngan ang mga tulisan sa kagabhion.
Gipahimangnoan usab ang publiko nga bantayan ang personal nga impormasyon ilabina sa social media aron malikayan ang pagpangilad ug uban pang cybercrime.
Dili usab dapat ibilin sa sakyanan ang mga bililhong butang sama sa cellphone, bag, ug kuwarta bisan kadiyot lang nga biyaan ang sakyanan.
Giawhag usab ang mga ginikanan nga tudluan ang ilang mga anak sa mga safety rules sama sa paghinumdom sa emergency contact numbers ug paglikay sa pakig-istorya sa dili kaila.
Importante usab ang maayong relasyon sa silingan tungod kay ang lig-on nga komunidad makatabang sa pagbantay ug paglikay sa krimen.
Gidasig usab ang pagpataod og CCTV cameras ug alarm systems tungod kay dako kini’g tabang sa paghadlok sa mga kawatan ug sa imbestigasyon sa mga kaso.
Gipahinumdoman usab ang publiko nga siguraduhon ang ilang bag ug pitaka pinaagi sa pagkupot niini pag-ayo aron malikayan ang mga pickpocket.
Sa katapusan, giawhag sa kapulisan ang tanan nga daling ireport sa police o barangay ang bisan unsang kadudahang kalihokan aron malikayan ang posibleng krimen sa komunidad.
Source: CPPO
I via Renante Socia Lada