Naluwas ang driver sa usa ka V-hire van human kini malimbuwad sa Cebu South Coastal Road sa Barangay Dumlog, sa northbound lane atol sa pag-uwan.
Matud sa driver, sa dihang iyang gitamakan ang brake, kalit nga mi-slide ang ligid sa van. Tungod niini, wala na niya makontrol ang sakyanan ug misangit kini sa gutter.
Human mabangga ang gutter, nisaka ang van ngadto sa sidewalk ug sa ulahi natumba tungod sa nagtapok nga yuta sa daplin sa dalan.
Dali usab nga mitabang ang mga trabahante sa construction nga anaa sa duol sa nahitabo. Sa pag-abot sa City of Talisay Traffic Operations & Development Authority o CT-TODA, wala na magpa-blotter ang driver ug wala usab siya magpadala sa tambalanan kay wala siyay grabeng angol.
Samtang, nag-awhag ang CT-TODA sa tanang motorista nga maghinay sa pagpadagan ug mag-amping ilabina kung nag-uwan aron malikayan ang susamang aksidente.
📸 City of Talisay Traffic Operations & Development Authority
I via Renante Socia Lada