Padayon ang kampanya sa Cebu Police Provincial Office (CPPO) aron mapalig-on ang kalinaw ug disiplina sa mga komunidad pinaagi sa Safer Cities Initiative.
Kagahapon Hulyo 3, nakadakop ang kapulisan og 568 ka mga nakalapas sa lokal nga ordinansa atol sa 254 ka dinungan nga operasyon sa nagkalain-laing lungsod ug siyudad sa lalawigan.
Base sa CPPO, ang mga nadakpan naglakip sa 49 ka nag-inom og ilimnong makahubog sa pampublikong lugar, 44 ka nanigarilyo sa gidili nga lugar, 28 ka naglakaw sa dalan nga walay sapot sa taas, 65 ka menor de edad nga nakalapas sa curfew, tulo ka kaso sa karaoke nga milapas sa gitugot nga oras, ug 379 ka paglapas sa mga ordinansa sa trapiko.
Sa kinatibuk-an, 379 ka mga nakalapas gipamulta, samtang 189 ang gipahimangnoan ug gipagawas subay sa mga lokal nga ordinansa. Mikabat sa ₱176,800 ang nakolektang multa ug silot gikan sa maong operasyon.
Gipasabot ni CPPO Provincial Director PCOL Abubakar Udang Mangelen Jr. nga ang kampanya dili lamang aron dakpon ang mga nakalapas, kondili aron mapugngan usab ang krimen, mapalig-on ang presensya sa kapulisan, ug mapatubo ang disiplina sa komunidad.
Gi-awhag usab niya ang tanang Sugboanon nga motuman sa mga lokal nga balaod ug makigtambayayong sa kapulisan.
Gidayeg usab ni PRO-7 Regional Director PBGEN Arnold Evangelista Abad ang dedikasyon sa mga pulis, samtang gipadayag ni Cebu Governor Pamela Baricuatro ang bug-os nga suporta sa Provincial Government sa padayon nga pagpatuman sa Safer Cities Initiative aron mapadayon ang malinawon, luwas, ug organisadong komunidad sa tibuok Sugbo.
📸 CPPO
I via Renante Socia Lada