Positibo sa alcohol ang driver sa motorsiklo nga nakadasmag sa usa ka 67 anyos nga senior citizen sa N. Bacalso Avenue, Barangay Linao, Talisay City, sayong kadlawon karong Hulyo 4, 2026.
Sumala sa City of Talisay Traffic Operations and Development Authority (CT-TODA), dali silang nangayo og tabang sa Land Transportation Office (LTO-7) aron ipahigayon ang sobriety ug chemical test sa driver. Gihimo ang maong test sa Minglanilla District Hospital ug pasiunang resulta nagpakita nga positibo kini sa alcohol.
Sa unang imbestigasyon, ang biktima mitabok sa dalan aron mosakay og traysikol paingon sa Tabunok aron mamalit, sa dihang naigo siya sa motorsiklo. Gituohang ang driver gikan pa sa usa ka imnanan uban sa ubang nagmotor sa wala pa mahitabo ang aksidente.
Tungod sa kusog sa impact, nalagpot ang driver ug ang iyang motorsiklo, ug midasmag pa kini sa usa ka kasugat nga sakyanan. Ang driver gidala sa Minglanilla District Hospital alang sa pagtambal.
Samtang, ang 67 anyos nga biktima gidala sa Cebu South Medical Center ug nagpabiling kritikal ang kahimtang. Padayon pa ang imbestigasyon sa mga awtoridad sa maong insidente.
📸 CT-TODA
I via Renante Socia. Lada