Nasikop ug na-preso ang pag umangkom human kini gipasanginlang mipusil-patay sa iyang uyo-an sa Sitio Tipolo, Brgy. Mabasa, Argao, Cebu, pasado alas-6:00 sa gabii niadtong Marso 16, 2025.
Ang suspek nailhan nga si Sany Solis, hingkod ang panuigon, residente sa maong dapit, samtang ang biktima mao si Dindo Datuin Solis, 52-anyos, nga nagpuyo usab sa maong lugar.
Matod sa inisyal nga imbestigasyon sa kapulisan sa lungsod sa Argao dugay na nga nagkalalis ang duha hangtod nga sa dihang niabot ang biktima sakay sa iyang motorsiklo uban ang menor de edad nga anak, gibalabagan sila sa suspek. Wala nagdugay mibunot kini og mipusil sa biktima na naigo sa ulo ug dughan na maoy hinungdan sa kamatayon niini.
Sa pagkakaron pdayon pang gipalawman sa mga otoridad ang imbestigasyon samtang giandam na ang kasong kriminal batok sa suspetsado. (Renante Socia Lada)