Usa ka 15-anyos nga menor de edad ang naluwas atol sa usa ka anti-drug operation sa Barangay Mambaling, samtang tulo ka indibidwal ang nadakpan tungod sa posisyon sa ilegal nga drogas ug ilegal nga mga armas atol sa One-Time-Big-Time (OTBT) operation sa Cebu City Police Office (CCPO).
Sa nasayran, gikan sa gabii sa Marso 15 hangtod sa sayong buntag sa Marso 16, gipahigayon sa kapulisan ang OPLAN BULABOG ug OPLAN BAKAL-SITA, nga gitumong sa pagpalig-on sa seguridad sa 80 ka barangay sa syudad. Ang operasyon gidumala ni CCPO Acting City Director PCOL Enrico E. Figueroa, uban sa tabang ni Police Regional Office 7 Regional Director PBGEN Redrico A. Maranan.
Sa maong operasyon, 153 ka menor de edad ang nadala tungod sa curfew violations ug gidala sa social welfare office.
Nikabsat usab sa 347 ka indibidwal ang natiketan tungod sa paglapas sa lokal nga ordinansa, lakip ang public drinking ug vandalism.
Samtang P10,000 nga kantidad sa gidudahang ilegal nga drogas ug duha ka ilegal nga armas ang nasakmit.
Gipasiugda ni PBGEN Maranan ang kamahinungdanon sa lig-on nga presensya sa kapulisan sa mga high-crime areas ug ang importansya sa kolaborasyon tali sa gobyerno ug komunidad aron makab-ot ang mas luwas nga Cebu City.
Matod pa, ang Cebu City Police Office nagpadayon sa ilang kampanya batok sa kriminalidad ug ilegal nga drogas aron masiguro ang kahapsay ug kasiguruhan sa publiko. (Renante Socia Lada)
(Source: CCPO)