Usa ka suspetsado ang napatay samtang usa ka pulis ang naangol sa nahitabong pinusilay sa Sitio Wakwak, Barangay Sawang Calero, dakbayan sa Sugbo, mga alas 5:00 sa buntag sa Miyerkules, Hulyo 16, 2025.
Ang suspetsado giila nga si Jaymart Arnais, alyas “Emat,” giingong usa ka badlungon sa maong lugar ug suspek sa sayong buntag nga pagpamusil sa usa ka internet station sa silingang Barangay Suba, diin napusilan si Ricardo Igot.
Matod sa initial nga imbestigasyon, nakadawat ug impormasyon ang mga sakop sa Sawang Calero Police Station, CCPO kabahin sa presensya ni Arnais sa ilang barangay. Dali silang miresponde apan giatubang sila ni Arnais ug nakigpinusilay kini.
Naangol si Patrolman Rembrandt Sabandeja, sakop sa Station Drug Enforcement Unit (SDEU), apan nakabaws siya ug nakapusil balik ni Arnais, nga midangat sa iyang kamatayon. Ang uban pang sakop sa pulis misanong usab sa maong engkwentro.
Si Sabandeja gidala dayon sa Cebu City Medical Center alang sa medikal nga tambal. Sa kasamtangan, luwas na siya ug padayong ginatambalan.
Gisaysay usab nga si Sabandeja nahatagan na ug Medalya ng Kagalingan niadtong Pebrero 2025 tungod sa iyang pagka-epektibo sa ilang mga anti-drug operasyon. Gipaabot nga hatagan na usab siya og dugang nga pag-ila tungod sa iyang kaisog ug serbisyo sa publiko.
I via Renante Socia Lada