Si Cebu Gobernor Pamela Baricuatro mitambong sa groundbreaking ceremony sa 30-megawatt EAUC Hybrid Energy Storage System Project sa AboitizPower facility sulod sa Mactan Economic Zone sa Lapu-Lapu City kagahapong adlawa Hulyo 17, 2025.
Kini nga proyekto mao ang pinakauna nga hybrid energy storage system sa tibuok Kabisay-an, ug gitumong aron motabang sa mas lig-on ug mas malungtaron nga sistema sa kuryente sa Cebu, labi na karon nga nagkadako ang panginahanglan sa enerhiya sa probinsya.
Kauban sa Gobernadora sa maong kalihukan mao sila Lapu-Lapu City Mayor Cynthia King Chan ug Congressman Junard “Ahong” Chan, uban sa mga opisyal sa publiko ug pribadong sektor, nga nagtigom aron ipakita ang ilang suporta sa renewable energy transition sa rehiyon.
Sa iyang pamulong, si Rhea Navarro, regional COO sa Transition Business Group sa AboitizPower, misulti nga ang proyekto dili lang usa ka investment, kundili usa ka kabahin sa ilang panan-aw sa paghatag og sustainable ug reliable nga enerhiya para sa nag-uswag nga ekonomiya sa Cebu.
Gipasabot usab ni Ronald Aldo Ramos, COO sa Operated Assets, nga ang hybrid system nga naglangkob sa battery storage ug diesel generation usa ka moderno ug episyente nga paagi sa pagresponde sa panginahanglan sa enerhiya.
Sa iyang mensahe, gidayeg ni Gobernor Baricuatro ang AboitizPower sa ilang lig-on ug tinud-anay nga komitment sa sustainable development. Gihulagway niya ang proyekto nga usa ka dakong lakang padulong sa inclusive ug walay pihing paglambo sa ekonomiya sa Cebu, diin walay Cebuanong mabiyaan.
Source: Cebu Province PIO
I via Renante Socia Lada