Tulo ka mga suspetsado ang nadakpan human gipuhag ang drug den sa Barangay Manga, Tagbilaran City, Biyernes sa hapon, Setyembre 12.
Base sa taho sa Philippine Drug Enforcement Agency (PDEA)-Bohol Provincial Office, nakumpiskar sa operasyon ang siyam ka pakete sa giingong shabu nga adunay kantidad nga muabot sa ₱68,000.
Usa sa nadakpan mao si Arnold, 43 anyos, nga giila nga nagdumala sa maong drug den. Kauban usab niyang nadakpan ang usa ka 30 anyos nga construction worker ug usa ka 45 anyos nga mananagat.
Sumala ni Leia Alcantara, information officer sa PDEA-Central Visayas, nakadawat og reklamo ang mga opisyal sa barangay bahin sa presensya sa drug den sa lugar. Human niini, nagsugod og case buildup ang PDEA-7 ug, uban sa tabang sa Tagbilaran City Police Station, gilusad ang operasyon pagkahuman sa usa ka semana nga close monitoring.
Ang mga suspetsado mag-atubang og hustong kaso nga ipasaka batok kanila, samtang ang mga nakumpiskar nga ebidensya gi imbestigar karon aron masiguro ang hustong proseso sa balaod.
Source: PDEA-7
I via Renante Socia Lada