Tulo ka mga suspetsado ang nadakpan sa checkpoint operation sa Carcar City sa hapon sa Hulyo 17, 2026. Nasakmit usab sa kapulisan ang gituohang shabu nga nagkantidad og ₱25,840, usa ka KG9 submachine gun, ug usa ka revolver.
Nahitabo ang insidente sa Sitio Kapatagan, Barangay Perrelos. Gisita sa mga pulis ang usa ka motorsiklo kay walay helmet ang drayber. Apan wala kini mohunong ug midagan hinuon, mao nga gigukod kini sa kapulisan.
Pagkahuman mapugngan ang motorsiklo, nadakpan ang drayber. Ang duha ka angkas misulay usab og dagan apan nadakpan gihapon.
Sa ilang pag-inspeksyon, nakuha sa mga pulis ang 76 ka pakete sa gituohang shabu, usa ka KG9 submachine gun nga adunay mga bala, usa ka revolver, silencer, kuwarta, upat ka cellphone, usa ka Honda Beat nga motorsiklo, ug uban pang mga butang.
Gidala ang tulo ka suspetsado sa Carcar City Police Station ug giandam na ang mga kaso batok kanila tungod sa ilegal nga drogas, ilegal nga pagpanag-iya og pusil, ug pagsukol sa kapulisan.
Sumala sa Cebu Police Provincial Office, ang maong operasyon nagpakita nga epektibo gihapon ang checkpoint sa pagdakop sa mga kriminal ug pagpugong sa ilegal nga drogas ug armas.
📸 CPPO
I via Renante Socia Lada