Nasakpan sa kapulisan ang usa ka lalaki nga gituohang nangawat og bag sulod sa Pinamungajan Central Elementary School sa Barangay Poblacion, Pinamungajan, Cebu niadtong Hulyo 16, 2026.
Sumala sa kapulisan, usa ka magtutudlo ang nakabantay nga nawala ang iyang brown nga sling bag. Sulod niini ang mga ATM card, government ID ug ₱3,000 nga kwarta.
Giingong misulod ang suspetsado sa classroom samtang wala makabantay ang magtutudlo ug gidala ang bag. Sa dihang nakita siya sa biktima, misinggit kini og tabang.
Dali nga migukod ang mga pulis uban sa tabang sa mga lumolopyo. Midagan ang suspetsado padulong sa baybayon ug gilabay pa ang bag sa dagat aron dili makuha.
Bisan pa niini, nasakpan gihapon sa kapulisan ang suspetsado ug ilang nabawi ang bag ug ang tanang sulod niini. Gidala ang suspetsado sa Pinamungajan Municipal Police Station, samtang giandam na ang kasong ipasaka batok kaniya.
Matud ni Cebu Police Provincial Office Director PCOL Abubakar Udang Mangelen Jr., dako ang natabang sa paspas nga responde sa kapulisan ug sa kooperasyon sa mga lumolopyo aron madakpan dayon ang suspetsado ug mabawi ang gikawat nga mga butang.
Giawhag usab niya ang publiko nga daling ireport sa kapulisan ang bisan unsang krimen aron mapadayon ang kalinaw ug kahapsay sa komunidad.
📸 CPPO
I via Renante Socia Lada