Nagmalampuson ang mga rescuer sa Cebu City sa pagluwas sa tulo ka residente nga na-stranded tungod sa kusog nga pagbaha sa La Paloma Village, Barangay Tisa, kagahapon Hulyo 30 sa hapon.
Gilunsad ang rescue operation alas 3:40 sa hapon human madawat ang report nga adunay mga residente nga natanggong sa sulod sa subdivision. Pag-abot sa mga responder, nakigtambayayong dayon sila sa Tisa Fire Brigade aron maluwas ang mga naipit bisan pa sa hapit tulo ka metros nga kataas sa baha ug kusog nga sulog sa tubig nga nagdala og mga kahoy ug uban pang debris.
Malampusong naluwas ang usa ka 74 anyos nga lalaki, usa ka 63 anyos nga lalaki, ug usa ka 23 anyos nga babaye pinaagi sa hiniusang paningkamot sa CCDRRMO Special Rescue Squad, Tisa Fire Brigade, Barangay Quick Response Team Habagat, Bureau of Fire Protection, ug uban pang rescue teams.
Padayon karon ang pag-assess sa kadaot ug gidaghanon sa mga apektadong pamilya. Walay matala nga namatay o nasamdan sa maong insidente. Giawhag sa Cebu City Government ang mga residente sa bahaon nga lugar nga magpabiling alerto ug mosunod sa mga pahimangno sa pag-evacuate kon gikinahanglan.
I via Renante Socia Lada