Nagpadayon ang Cebu City Government sa paghatag og pinansyal nga tabang sa mga pamilyang naapektuhan sa Bagyong Tino. Personal nga mibisita si Mayor Nestor Archival sa mga payout site sa Barangay Lahug ug Sawang Calero aron masiguro ang hapsay nga pag-apod-apod sa ayuda, kagahapon Hulyo 30.
Kapin sa 41,000 ka kwalipikadong benepisyaryo gikan sa 80 ka barangay ang makadawat sa tabang. Ang mga balay nga hingpit nga naguba makadawat og ₱5,000, samtang ang mga balay nga partially damaged tungod sa baha makadawat og ₱2,500.
Sa Barangay Lahug, 253 ka benepisyaryo ang nakadawat na sa ayuda, samtang 2,266 ka benepisyaryo ang naglinya sa Sawang Calero. Gipasiugda ni Mayor Archival nga ang programa kabahin sa pagtabang sa mga pamilya nga naapektuhan sa bagyo.
Ang pag-apod-apod sa ayuda magpadayon hangtod Agosto 7, gawas sa Domingo. Gipatuman usab sa siyudad ang hugot nga beripikasyon aron masiguro nga ang tabang maabot sa mga tinuod nga benepisyaryo.
I via Renante Socia Lada