Usa ka drug operations ang gihimo sa Camotes Island nga misangpot sa pagkasakmit og kapin ₱7.6 milyon nga balor sa shabu ug pagdakop sa daghang high-value targets. Ang operasyon gihimo sa Agosto 21 hangtod 22, 2025 pinaagi sa panaghiusa sa Cebu Police Provincial Office (CPPO), Provincial Drug Enforcement Unit (PDEU) ug PDEA-7.
Sa unang raid sa Barangay Santa Cruz, San Francisco, nakuhaan og 515 gramos nga shabu nagkantidad og ₱3.5 milyon ug nadakpan ang usa ka giilang sentro nga tig-apod-apod sa isla uban sa iyang kauban. Sa ikaduhang operasyon sa Sitio Matab-ang, Barangay Sonog, laing 505 gramos nga shabu nagkantidad og ₱3.43 milyon ang nasakmit, apan ang usa sa mga suspek naka-ilyas ug padayon nga gipangita.
Samtang sa ikatulong buy-bust sa Sitio Baring, Barangay San Isidro pasado alas-1:00 sa kadlawon sa Agosto 22, nasakmit ang 105 gramos nga shabu nagkantidad og ₱714,000, kauban ang marked money ug drug paraphernalia. Duha ka high-value targets ang nadakpan sa maong operasyon.
Sumala sa imbestigasyon, ang sindikato nakapadagan og kapin 500 gramos nga shabu matag semana sa Camotes, nga dugay nang nakaapekto sa kalinaw ug kahimtang sa isla. Giingon ni PCOL Christopher M. Bermudez, Acting Provincial Director sa CPPO, nga kini usa ka “historic strike” nga nagpakita nga dili mahimong safe haven ang Camotes para sa iligal nga drogas.
Giandam na ang mga kaso ilawom sa Sections 5 ug 11, Article II sa RA 9165 batok sa mga nadakpan. Giingon pa sa kapulisan nga kini mao pa lamang ang sinugdanan sa mas hugot nga kampanya batok sa ilegal nga droga sa probinsya.
Source: CPPO
I via Renante Socia Lada