Nadakpan na ang usa ka lalaki nga nailhan nga Top 8 Most Wanted Person sa Central Visayas Region, human sa joint operation nga gihimo sa Regional Intelligence Division (RID-7) ug sa Mabolo Police Station 4, niadtong nakalabay na adlaw.
Ang operasyon gipangulohan ni PMAJ Eric C. Gingoyon, hepe sa Mabolo Police Station, nga mihimo sa pag-serve sa Warrant of Arrest alang sa kaso nga kalapasan sa Sec. 5, Article 2 sa Republic Act 9165 o Comprehensive Dangerous Drugs Act of 2002. Ang dakop nahitabo sa North Reclamation Area, Brgy. Carreta, Sugbo City.
Base sa record, ang warrant gi-isyu sa Regional Trial Court Branch 21, Cebu City niadtong Marso 18, 2024, uban sa NO BAIL recommended. Human madakpi, gipahibalo sa mga otoridad ang akusado sa iyang legal nga katungod ug gipaubos na kini sa kustodiya sa Mabolo Police Station 4 samtang nagpaabot sa dugang nga proseso legal.
Si PCOL Enrico E. Figueroa, Acting City Director sa Cebu City Police Office (CCPO), midayeg sa paningkamot ug dedikasyon sa Mabolo Pulis ug RID-7 sa ilang kalampusan. Iyang gisiguro nga padayon palig-onon ang kampanya sa pagpangita ug pagdakop sa mga most wanted persons aron masiguro ang malinawon ug luwas nga dakbayan alang sa tanang Sugboanon.
Source: CCPO
I via Renante Socia Lada