Nadakpan sa kapulisan sa San Fernando, Cebu ang usa ka wanted person atol sa gipakusog nga manhunt operation nga gihimo sa mga sakop sa San Fernando Municipal Police Station niadtong milabay nga adlaw sa Barangay South Poblacion.
Ang nadakpan giila nga 65 anyos nga tricycle driver ug residente sa Toledo City, Cebu. Gidakop siya tungod sa kasong paglapas sa Republic Act 8293 o Intellectual Property Code of the Philippines, ilabina sa kasong Trademark Infringement.
Giserbihan sa kapulisan ang suspetsado og warrant of arrest nga gi-isyu sa Regional Trial Court, Branch 65 sa Talisay City, Cebu. Gitakda sa korte ang piyansa nga nagkantidad og ₱30,000 alang sa temporaryong kagawasan sa akusado.
Sa pagkakaron, anaa na sa kustodiya sa San Fernando Municipal Police Station ang nadakpan samtang gihulat ang iyang turnover ngadto sa korte nga nag-isyu sa warrant.
Gidayeg ni Cebu Police Provincial Office Director PCOL Abubakar Udang Mangelen Jr. ang mga operatiba tungod sa ilang dedikasyon ug maayong pagpatuman sa operasyon. Matod niya, nagpakita kini sa padayon nga paningkamot sa Cebu PPO sa pagpangita ug pagdakop sa mga wanted person aron walay makalikay sa balaod.
Padayon usab ang Cebu Police Provincial Office sa pagpalig-on sa ilang kampanya batok sa kriminalidad pinaagi sa intelligence-driven operations aron mapadayon ang kalinaw ug kahapsay sa tibuok lalawigan sa Sugbo.
📸 CPPO
I via Renante Socia Lada