Nasikop sa kapulisan sa Oslob ang usa ka lalaki atol sa pagpatuman og search warrant sa Barangay Cañang, Oslob, Sugbo niadtong nakakabay nga adlaw.
Sa operasyon nga gihimo sa mga operatiba sa Oslob Municipal Police Station, narekober gikan sa suspetsado ang usa ka .38 caliber revolver ug tulo ka buhing bala. Ang maong lalaki gipasanginlan og paglapas sa Republic Act 10591 o ang balaod batok sa ilegal nga pagpanag-iya og armas ug bala.
Sumala sa kapulisan, ang search warrant gi-isyu sa Regional Trial Court Branch 62 sa Oslob, Sugbo. Human sa pagdakop, gipahibalo dayon sa suspetsado ang iyang mga katungod sa pinulongan nga iyang nasabtan.
Gihimo usab sa mga pulis ang hustong imbentaryo sa mga nakompiskar nga ebidensya sulod sa balay sa suspetsado uban sa presensya sa mga opisyal sa barangay ug mga testigo aron masiguro nga nasunod ang legal nga proseso.
Ang nadakpang suspek ug ang nakompiskar nga armas ug mga bala gidala sa Oslob Municipal Police Station alang sa hustong dokumentasyon ug disposisyon.
Gidayeg ni Cebu Police Provincial Office Director PCOL Abubakar Udang Mangelen Jr. ang mga operatiba nga mipatuman sa operasyon.
Matud pa niya, padayon nga palig-onon sa kapulisan ang kampanya batok sa mga loose firearms ug uban pang kriminal nga kalihokan aron mapadayon ang kalinaw ug kaluwasan sa komunidad.