Nadakpan ang kapin 640 ka indibidwal sa nagkalain-laing anti-criminality operations nga gihimo sa Cebu Police Provincial Office (CPPO) atol sa tibuok probinsiya niadtong Mayo 22, 2026. Kabahin kini sa mas hugot nga pagpatuman sa Safer Cities Initiative ug sa direktiba ni SILG Jonvic Remulla aron mapalig-on ang kalinaw ug kahapsay pinaagi sa estriktong pagpatuman sa mga lokal nga ordinansa.
Base sa report sa CPPO, adunay 231 ka operasyon nga gipahigayon nga misangpot sa pagkadakop sa mga nakalapas sa lain-laing ordinansa sama sa pag-inom ug pagpanigarilyo sa publikong lugar, paglakaw sa kadalanan nga walay sapot sa taas nga lawas, paglapas sa curfew sa mga menor de edad, ilegal nga videoke lapas sa gitugot nga oras, ug mga paglapas sa traffic ordinances sa siyudad ug lungsod.
Sa datos sa kapulisan, 444 ka tawo ang nadakpan tungod sa traffic violations, 71 tungod sa pag-inom sa publikong lugar, 15 sa pagpanigarilyo sa bawal nga lugar, 22 ang nasakpan nga naglatagaw nga walay sapot sa taas, samtang 84 ka menor de edad ang nakalapas sa curfew ordinance.
Mokabat usab sa ₱213,900 ang nakolektang multa ug silot.
Matod ni PCOL Abubakar Udang Mangelen Jr., Provincial Director sa CPPO, dili lamang pagdakop sa mga violators ang tumong sa operasyon kondili ang pagpalig-on usab sa disiplina ug responsibilidad sa katawhan.
Iyang giingon nga kung disiplinado ang komunidad ug mosunod sa balaod, mas moubos ang posibilidad nga motaas ang kriminalidad.
Gipasabot usab ni PBGEN Arnold Evangelista Abad, Regional Director sa PRO7, nga dako’g papel ang hugot apan patas nga pagpatuman sa mga ordinansa aron malikayan ang mas dagkong krimen. Matod niya, ang gagmay nga paglapas kung pasagdan mahimong mosangpot sa seryosong krimen.
Samtang, nagpahayag usab og suporta si Cebu Governor Pamela Baricuatro sa kampanya sa kapolisan. Matod niya, importante ang kooperasyon sa kapulisan, lokal nga panggamhanan ug publiko aron mapadayon ang malinawon ug luwas nga komunidad alang sa tanang Sugboanon.
Gipasalig sa CPPO nga ipadayon pa nila ang mga anti-criminality operations, police visibility patrols ug pagpatuman sa mga ordinansa sa tanang lungsod ug siyudad sa probinsiya aron masiguro ang kalinaw ug kaluwasan sa publiko.
📸 CPPO
I via Renante Socia Lada