Nadakpan sa kapulisan ang usa ka lalaki nga dugay nang gipangita sa balaod ug nalista isip usa sa Top Most Wanted Persons sa regional, provincial, ug municipal level atol sa operasyon nga gihimo sa Poro, Cebu kagahapon Hunyo 16, 2026.
Ang suspek gidakop sa mga operatiba sa Poro Municipal Police Station uban sa Regional Intelligence Division 7 (RID-7), Regional Intelligence Unit 7 (RIU-7), ug Provincial Intelligence Unit (PIU). Ang operasyon gihimo sa Eastern Poblacion, Poro, Cebu base sa impormasyon nga nakuha sa kapulisan.
Ang 69-anyos nga suspek, usa ka biyudo ug residente sa Western Poblacion, Poro, nag-atubang og kasong rape ubos sa Article 266-A sa Revised Penal Code. Gidakop siya pinaagi sa warrant of arrest nga gipagawas sa Regional Trial Court Branch 92 sa Danao City. Walay gitakdang piyansa alang sa iyang temporaryong kagawasan.
Sumala sa kapulisan, dugay nang nakalikay sa pagdakop ang suspek pinaagi sa kanunay nga pagbalhin-balhin og puy-anan ug pagtago sa mga hilit ug layong lugar. Human sa padayon nga surveillance ug intelligence operations, nakumpirmar sa mga otoridad ang iyang nahimutangan nga misangpot sa iyang pagdakop.
Gidayeg ni PCOL Abubakar Udang Mangelen Jr., Provincial Director sa Cebu Police Provincial Office, ang mga operatiba nga nakalampus sa misyon. Matud pa niya, ang maong pagdakop nagpakita sa lig-on nga determinasyon sa Philippine National Police nga mapatubag sa balaod ang mga wanted persons bisan unsa pa kadugay silang nakalikay sa pagdakop. Padayon usab nga nag-awhag ang CPPO sa publiko sa paghatag og impormasyon aron matabangan ang kapulisan sa pagdakop sa ubang mga wanted nga tawo.
I via Renante Socia Lada