Patay ang usa ka motorcycle rider human gipamusil sa wala pa mailhing suspek sa usa ka bahin sa Davao del Sur niadtong Martes sa hapon. Sumala sa kapulisan, nagbiyahe ang biktima sa usa ka barangay road sa dihang giduolan ug gipabuthan sa armadong lalaki nga nagsakay usab og motorsiklo.
Gideklarang dead-on-arrival sa ospital ang biktima tungod sa mga samad sa bala nga iyang naangkon sa lawas. Gilayon usab nga naglunsad og hot pursuit operation ang mga awtoridad ug nagbutang og mga checkpoint sa kasikbit nga mga lugar aron masubay ang mikalas nga suspek.
Padayon pa ang imbestigasyon sa kapulisan aron mahibal-an ang motibo sa krimen, lakip na ang posibilidad sa personal nga panaglalis ug uban pang mga anggulo.
Nanawagan usab ang mga awtoridad sa mga adunay kahibalo mahitungod sa insidente nga makigkontak sa labing duol nga estasyon sa kapulisan.(Camille Santos Naraga)(Source: Contributed)