Naserbihan og warrant of arrest ang usa ka 30 anyos nga lalaki nga giila isip Top 7 Most Wanted Person sa Naga City tungod sa kasong robbery. Nahitabo kini niadtong nakalabay nga mga adlaw pinaagi sa operasyon sa mga sakop sa City of Naga Police Station.
Ang warrant gisilbi sulod sa BJMP 7 Naga City Jail–Male Dormitory sa Barangay Maghaway, Talisay City. Matud sa kapulisan, ang suspek residente sa Barangay South Poblacion, Naga City ug naa na daan sa prisohan tungod sa laing kaso sa dihang gisilbihan siya sa warrant.
Gibase sa rekord sa korte, ang suspek giakusahan og Robbery with Force Upon Things human siya gipasanginlang misulod sa balay sa usa ka biktima niadtong Marso 2026 ug gikuha ang cellphone ug kuwarta nga walay pagtugot sa tag-iya. Human sa insidente, mikalagiw siya gikan sa lugar.
Ang warrant of arrest gi-isyu sa Regional Trial Court Branch 76 sa Naga City, Cebu. Gitugotan usab sa korte ang piyansa nga nagkantidad og ₱48,000 alang sa iyang temporaryong kagawasan. Giingnan usab siya sa mga pulis sa iyang mga katungod subay sa balaod sa dihang gisilbi ang warrant.
Gidayeg ni Cebu Police Provincial Office Director PCOL Abubakar Udang Mangelen Jr. ang mga operatiba sa ilang malampusong operasyon. Matud niya, bisan unsa pa kadugay ang paglikay sa usa ka tawo sa hustisya, moabot gihapon ang panahon nga siya manubag sa balaod. Padayon usab ang CPPO sa ilang kampanya batok sa mga wanted person ug nag-awhag sa publiko nga motabang pinaagi sa paghatag og impormasyon ngadto sa kapulisan.
I via Renante Socia Lada