Nadakpan sa kapulisan ang Top 8 Regional Most Wanted Person sa Central Visayas atol sa operasyon nga gipahigayon sa Police Regional Office 7 (PRO7) sa Barangay Canjulao, Lapu-Lapu City niadtong Hunyo 26.
Ang suspetsado nga nailhang alyas “Balata” gidakop sa mga sakop sa Police Station 3 sa Lapu-Lapu City Police Office (LCPO) alas 2:10 sa hapon pinaagi sa warrant of arrest. Sumala sa kapulisan, ang pagdakop nahimo human sa dugayng intelligence gathering, surveillance ug pagpangita sa iyang gitaguan.
Giatubang sa suspetsado ang kasong Qualified Unlawful Possession of Firearm and Ammunition ubos sa Republic Act No. 10591 o Comprehensive Firearms and Ammunition Regulation Act. Ang warrant of arrest gi-isyu sa
Regional Trial Court Branch 54 sa Lapu-Lapu City ug adunay rekomendar nga piyansa nga ₱120,000.
Human sa pagdakop, gidala ang suspetsado sa custodial facility sa Lapu-Lapu City Police Office samtang gihulat ang iyang pagpresentar sa korte nga nagpagula sa warrant.
Gipasidunggan ni PRO7 Regional Director Police Brigadier General Arnold E. Abad ang mga operatiba sa ilang malampusong operasyon.
Matud pa niya, nagpakita kini sa epektibong intelligence operations ug lig-on nga koordinasyon sa kapulisan aron madakpan ang mga wanted person ug mapalig-on ang kalinaw ug kaluwasan sa komunidad.
I via Renante Socia Lada