Nasakmit sa Police Regional Office 7 (PRO7) ang kapin 1.7 ka kilo sa gidudang shabu nga nagkantidad og ₱11.65 milyon ug nadakpan ang 71 ka mga suspetsado atol sa 60 ka buy-bust operation nga gipahigayon sulod lamang sa 24 oras sa nagkadaiyang lugar sa Central Visayas.
Ang operasyon kabahin sa kampanya sa Department of the Interior and Local Government (DILG) ubos sa Safer Cities Initiative ug sa gipakusog nga kampanya sa Philippine National Police batok sa ilegal nga drogas.
Usa sa labing dakong operasyon nahitabo niadtong Hunyo 27, 2026, sa Sitio San Isidro, Barangay Mabolo, Cebu City, diin nadakpan ang usa ka suspetsado nga giila sa alyas “Jun-Jun.” Narekober gikan kaniya ang mga 1 ka kilo sa gidudang shabu nga adunay balor nga ₱6.8 milyon, lakip na ang mga drug paraphernalia.
Sa laing operasyon niadtong Hunyo 26, sa V. Rama Avenue, Barangay Calamba, Cebu City, nadakpan usab ang alyas “James.” Nasakmit gikan kaniya ang 550 gramos sa gidudang shabu nga nagkantidad og ₱3.74 milyon, uban sa ubang drug paraphernalia.
Sumala sa PRO7, ang ubang operasyon nga gihimo sa nagkalain-laing police units sa rehiyon nakadugang pa sa gidaghanon sa mga nadakpan ug sa mga ilegal nga droga nga nasakmit.
Ang tanang 71 ka suspetsado anaa na karon sa kustodiya sa kapulisan ug giandam na ang kaso batok kanila tungod sa paglapas sa Republic Act 9165 o Comprehensive Dangerous Drugs Act of 2002.
Matud pa ni Police Brigadier General Arnold E. Abad, Regional Director sa PRO7, padayon ug walay hunong ang ilang kampanya batok sa ilegal nga drogas aron mapanalipdan ang kalinaw ug kaluwasan sa mga komunidad sa Central Visayas.
Giawhag usab sa PRO7 ang publiko nga magtinabangay sa kapulisan pinaagi sa pagreport dayon sa bisan unsang kahimtang o mga tawo nga nalambigit sa ilegal nga drogas aron dali silang maaksyunan.
I via Renante Socia Lada