Nasikop sa kapulisan sa Carcar City ang usa ka lalaki nga giilang Top 6 Most Wanted Person sa lebel probinsyal ug munisipyo tungod sa kasong murder atol sa usa ka intelihensiya nga operasyon niadtong nakalabay nga adlaw.
Gipahigayon ang operasyon sa usa ka barangay sa Carcar City pinaagi sa hiniusang pwersa sa Intelligence Unit, Drug Enforcement Unit, ug Warrant Server Section sa Carcar City Police Station. Pinaagi sa dugayng pagpangita ug pagmonitor, malampusong naserbisyohan sa kapulisan ang warrant of arrest batok sa suspetsado ug nadakpan kini nga walay pagsukol.
Base sa imbestigasyon sa kapulisan, ang suspetsado usa sa mga giingong nalambigit sa pagpamusil niadtong Marso 2, 2026 nga nakamatay sa usa ka biktima. Human sa insidente, nagtago ang suspek gawas sa Sugbo aron malikayan ang pagdakop.
Apan pinaagi sa padayon nga intelligence monitoring ug koordinasyon sa mga operatiba, natultolan ug nadakpan gihapon ang akusado.
Matud pa sa kapulisan, gihimo ang operasyon subay sa legal nga proseso ug sa giya sa Korte Suprema, lakip na ang paggamit og body-worn cameras aron masiguro ang hustong pagpatuman sa pag-aresto.
Karon, anaa na sa kustodiya sa Carcar City Police Station ang suspek samtang giandam ang hustong legal nga proseso batok kaniya. Dako usab kini nga tabang sa kampanya sa kapulisan batok sa mga wanted person sa probinsiya.
Si PCOL Abubakar Udang Mangelen Jr., direktor sa Cebu Police Provincial Office, miingon nga dakong kalampusan kini sa ilang kampanya batok sa mga kriminal.
Matud niya, padayon nilang pangitaon ug dakpon ang mga wanted person bisan asa pa kini manago aron maseguro nga mahatagan og hustisya ang mga biktima ug mapadayon ang kalinaw ug kahapsay sa Sugbo.
Source: CPPO
I via Renante Socia Lada