Nadakpan sa mga kapulisan sa Police Station 4 (Mabolo) sa Cebu City Police Office (CCPO) ang usa ka Top 5 Provincial Level Most Wanted Person atol sa operasyon nga gihimo sa hapon sa Hulyo 1, 2026. Kabahin kini sa padayon nga kampanya sa kapulisan batok sa mga wanted nga tawo.
Ang operasyon gipangulohan sa mga sakop sa Police Station 4 ubos sa pagdumala ni PMAJ Thom Ed Lacaba Taghoy II. Gisilbihan ang suspetsado og warrant of arrest tungod sa paglapas sa Sections 5 ug 11, Article II sa Republic Act No. 9165 o Comprehensive Dangerous Drugs Act of 2002. Ang maong warrant gipagawas sa Regional Trial Court Branch 21 niadtong Abril 30, 2026, ug walay piyansa nga gitugot.
Human sa pagdakop, gidala ang akusado sa Male Holding Facility sa Police Station 4 diin kini nagpabiling gitanggong samtang naghulat sa sunod nga proseso sa korte.
Sumala sa CCPO, ang maong kalampusan nagpakita sa ilang lig-on nga paningkamot sa pagdakop sa mga wanted nga tawo ug pagpatuman sa balaod aron mapadayon ang kalinaw ug kaluwasan sa mga lumulupyo sa Cebu City.
I via Renante Socia Lada