Naangol ang usa ka traffic enforcer sa Cebu City Traffic Office (CCTO) human mabanggaan sa usa ka Isuzu MU-X samtang nagdumala sa trapiko sa eskina sa Escario Street ug Osmeña Boulevard, Barangay Capitol Site, Cebu City, sa buntag sa Hulyo 1, 2026.
Sa imbestigasyon, gipahunong sa traffic enforcer ang sakyanan aron mahan-ay ang dagan sa trapiko. Mituman sa una ang drayber apan kalit lang kini mipadagan pag-usab ug nabanggaan ang enforcer. Naligsan usab ang iyang wala nga kamot ug dayon milayas ang drayber nga wala motabang.
Gidala dayon ang traffic enforcer sa Cebu Doctors’ Hospital aron matambalan. Wala madugay, nadakpan ang drayber tungod sa trapik ug sa tabang sa mga tawo nga misunod kaniya.
Karon, anaa na sa kustodiya sa kapulisan ang drayber ug giandam na ang mga kaso batok kaniya. Nagpasalig usab ang Cebu City Police Office (CCPO) nga magpadayon sila sa pagpanalipod sa mga traffic enforcer ug sa pagpatuman sa balaod.
I via Renante Socia Lada