Nagpagawas og pamahayag ang Cebu City Police Office (CCPO) human sa usa ka social media post nga adunay hulga batok sa usa ka pribadong kolehiyo sa Leon Kilat Street, Cebu City.
Pagkahibalo sa insidente, dali nga miresponde ang mga pulis uban sa EOD, SWAT, CCDRRMO, ug mga opisyal sa eskwelahan aron susihon ang tibuok kampus.
Human sa ilang inspeksyon, wala silay nakit-ang bisan unsang bomba o lain pang hulga sa sulod sa eskwelahan. Bisan pa niini, gidugangan sa CCPO ang mga pulis sa palibot sa eskwelahan aron masiguro ang kaluwasan sa tanan.
Gipahimangno sa CCPO nga ang pag-post og hulga sa social media, bisan pa og binuang lang, mahimong mosangpot og kasong kriminal. Giawhag usab ang publiko nga dili dayon motuo o mopakaylap og impormasyon nga wala pa mapamatud-i.
Gidasig sa CCPO ang publiko nga magpabiling kalmado ug ireport dayon sa pulis ang bisan unsang kadudahang lihok o hulga. Nagpasalig usab ang kapulisan nga magpadayon sila sa pagpanalipod sa kaluwasan sa mga estudyante, magtutudlo, ug sa tibuok komunidad.
I via Renante Socia Lada