Nasakpan sa operasyon sa Cebu City Police Office (CCPO) ang 18 ka street vendors human sa mga reklamo gikan sa mga motorista nga giingong gipugos o gipressure sa pagpalit og mga baligya samtang nagbiyahe sa mga dagkong dalan ug interseksyon sa siyudad.
Gipahigayon ang monitoring ug enforcement operation kagahapon Mayo 30, 2026 ubos sa pagmando ni CCPO Director Police Colonel George V. Ylanan ug subay sa direktiba ni Cebu City Mayor Nestor Archival. Gipakusog sa kapulisan ang ilang presensya sa mga lugar nga adunay mga report sa maong kalihokan.
Atol sa operasyon, nasuta ug nasakpan ang 18 ka mga tawo nga nagbaligya sa daplin sa dalan sa Gorordo Avenue duol sa JY Square sa Barangay Lahug. Gidala sila sa CCPO alang sa interbyu, dokumentasyon, ug pag-ila sa ilang identidad ug kalihokan.
Human sa beripikasyon, natala ug na-identify ang tanang nasakpan. Gipasidan-an usab sila sa kapulisan nga likayan ang bisan unsang binuhatan nga mahimong makasamok, makapahadlok, o makahatag og peligro sa mga motorista ug sa publiko.
Dayon gidala ang mga indibidwal ngadto sa Barangay Lahug uban sa mga sakop sa Mabolo Police Station aron sa dugang koordinasyon ug pag-verify uban sa lokal nga mga opisyal. Nagpabiling determinado ang CCPO sa pagmintinar sa kalinaw, kahapsay, ug kaluwasan sa tanang mogamit sa kadalanan sa Cebu City.
📸 CCPO
I via Renante Socia Lada