Nasikop ang usa ka Top 4 Most Wanted Person nga probinsyal lebel ug Top 2 Most Wanted sa municipal lebel atol sa usa ka intelligence-driven operation niadtong Pebrero 13, 2026.
Ang suspek, nga nailhan lang sa alyas nga “Gipor,” 48 anyos, minyo ug walay trabaho, residente sa Purok Mohon II, Barangay Langtad, City of Naga, nadakpan sa Barangay Maghaway, Talisay City.
Gipahigayon ang operasyon sa Intelligence Unit, Drug Enforcement Unit (DEU), ug Tracker Team sa City of Naga Police Station pinaagi sa Warrant of Arrest nga gi-isyu ni Hon. Albie Carmelo R. Pescadero, Presiding Judge sa Family Court, Branch 12, City of Naga.
Gitubang sa suspek ang tulo ka kaso sa Acts of Lasciviousness nga may kalabutan sa Section 5(b) sa Republic Act 7610 o balaod batok sa child abuse. Gitakda sa korte ang piyansa nga ₱180,000 matag usa ka kaso.
Sa imbestigasyon, nasayran nga kaniadto nadakpan na usab ang suspek niadtong 2011 tungod sa paglapas sa RA 9165 o Comprehensive Dangerous Drugs Act, apan na-dismiss ang kaso ug nakagawas siya niadtong 2014. Niadtong 2025, gipasanginlan siya og balik-balik nga malaw-ay nga binuhatan batok sa iyang 14-anyos nga anak nga babaye. Human masang-at ang reklamo, nagtago siya sa nagkalain-laing lugar aron malikayan ang pagdakop.
Niadtong Nobyembre 2025, nadakpan usab siya sa buy-bust operation tungod sa paglapas sa Sections 5 ug 11 sa RA 9165. Pinaagi sa E-Warrant System, nakompirmar ang pending warrant batok kaniya sa kaso nga may kalabutan sa child abuse.
Gidayeg ni PCOL Abubakar Udang Mangelen Jr., Provincial Director sa Cebu Police Provincial Office, ang operating team sa ilang kalampusan. Miingon siya nga ang pagdakop nagpakita sa hugot nga kampanya sa kapulisan batok sa mga kriminal, labi na kadtong naglapas sa kababayen-an ug kabataan.
Gipasabot sa kapulisan nga padayon ang ilang operasyon batok sa mga tawo nga adunay warrant of arrest aron mapalig-on ang hustisya ug kaluwasan sa komunidad.
Source: CPPO
I via Renante Socia Lada