Pulos nakabsan sa kinabuhi ang magtiayon nga parehong senior citizen human nabanggaan sa delivery truck niadtong Valentine’s Day sa South Road Properties (SRP) sa Cebu City.
Ang mga biktima giila sa Cebu City Police Office (CCPO) na mao sila Salvador Geraldizo Jr., 67 anyos, ug iyang asawa nga si Cecilia Geraldizo, 68 anyos, mga residente sa Tupas Street, Barangay Sawang Calero, Cebu City. Sumala sa report, nitabok ang magtiayon sa dalan sa maong lugar sa dihang nahitabo ang insidente.
Matud pa sa driver sa delivery truck nga si Charlie Alcontin, 38 anyos, kalit lang matod pa nilabang ang mga biktima gikan sa center island. Miingon siya nga mibalik pa og dagan ang magtiayon sa ilang giagian nga maoy hinungdan nga wala na niya malikayi ang pagbangga.
Tungod sa kusog nga impact, nalagpot ang duha ka biktima ug nahagba sa aspaltadong karsada. Dali silang gidala sa Cebu City Medical Center apan gideklarar nga dead on arrival.
Sa pagkakaron, nag-atubang og kasong Reckless Imprudence Resulting in Double Homicide ang driver nga si Alcontin samtang padayon ang imbestigasyon sa mga otoridad aron matino ang tanang kahimtang sa maong aksidente.
I via Renante Socia Lada