Nadakpan sa kapulisan sa Danao City ang usa ka lalaki nga giila nga Top 3 Most Wanted Person sa lebel sa probinsya ug munisipyo atol sa operasyon sa pagsilbi sa warrant of arrest niadtong nakalabay nga adlaw sa Barangay Cogon Cruz, Danao City, Cebu.
Ang nadakpan usa ka 46 anyos nga minyo ug residente sa Danao City. Siya gidakop sa mga operatiba sa Intel ug Warrant Server sa Danao City Police Station tungod sa warrant of arrest alang sa duha ka kaso sa rape ubos sa Article 266-A sa Revised Penal Code.
Ang maong warrant gipagawas sa Regional Trial Court Branch 92 sa Danao City, Cebu. Sumala sa kapulisan, non-bailable ang mga kaso nga giatubang sa suspetsado.
Matud pa sa mga otoridad, resulta sa intelihente ug planadong operasyon sa warrant server team ang malampusong pagdakop sa akusado. Human sa pagdakop, gipahibalo siya sa iyang katungod ubos sa balaod ug gidala dayon sa kustodiya sa Danao City Police Station samtang gihulat ang pagturn-over kaniya ngadto sa korte nga nagpagawas sa warrant.
Kabahin kini sa gipakusog nga kampanya sa Cebu Police Provincial Office batok sa mga wanted person aron masiguro ang dali nga pagdakop sa mga nag-atubang og seryosong kaso.
Gidayeg usab ni Cebu PPO Provincial Director PCOL Abubakar Udang Mangelen Jr. ang mga pulis nga nagpatuman sa operasyon. Matud niya, padayon ang Cebu PPO sa pagpangita ug pagdakop sa mga wanted person aron masiguro nga mahatagan og hustisya ang mga biktima.
I via Renante Socia Lada