Sa Cebu Province, miabot sa 589 ka mga indibidwal ang nadakpan sa lain-laing operasyon sa Cebu Police Provincial Office (Cebu PPO) kagahapon Mayo 23, 2026. Kini kabahin sa kampanya nga “Safer Cities Initiative” nga nagtinguha sa pagpahugot sa seguridad ug disiplina sa mga komunidad.
Ang maong kampanya gi-implementar ubos sa direktiba ni Interior and Local Government Secretary Juanito Victor ‘Jonvic’ Remulla, diin gipasiugda ang estrikto nga pagpatuman sa mga lokal nga ordinansa, mas daghang police visibility, ug pagpugong sa krimen pinaagi sa disiplina sa publiko.
Sa report sa kapulisan, miabot sa 226 ka operasyon ang gihimo nga nagresulta sa daghang pagdakop, sama sa traffic violations, pag-inom sa pampublikong lugar, curfew violations sa mga menor de edad, pagpanigarilyo sa bawal nga lugar, ug uban pang ordinansa nga gilapas.
Nakakolekta usab ang kapulisan og ₱207,611.00 gikan sa multa ug penalties.
Miingon si Cebu PPO Provincial Director Abubakar Udang Mangelen Jr nga importante ang padayon nga pagpatuman sa balaod aron malikayan ang krimen ug mapalig-on ang disiplina sa komunidad.
Gisuportahan usab kini ni PRO7 Regional Director Arnold Evangelista Abad, nga miingon nga dako ang papel sa police visibility sa pagpamenos sa krimen.
Gipakita usab ni Cebu Governor Pamela Baricuatro ang iyang suporta sa maong programa, ug giingon nga ang kooperasyon sa gobyerno ug katawhan maoy yawe sa mas luwas ug malinawon nga Cebu. Padayon ang Cebu PPO sa ilang operasyon aron mapadayon ang kahapsay ug kaluwasan sa tibuok probinsya.
I via Renante Socia Lada