Natunton ug nadakpan sa kapulisan ang usa sa Top 3 Most Wanted Persons sa rehiyon sa Central Visayas, kinsa giila sa alyas ‘Fredo’, 23 anyos ug residente sa Brgy. Kinasang-an, Cebu City.
Gipahigayon ang maong operasyon sa Abril 28, 2025, pinaagi sa hiniusang pwersa sa Regional Intelligence Unit (RIU) 7 ug City Mobile Force Company, ubos sa panguna ni PLTCOL Ferdinand Modales Casiano.
Si ‘Fredo’ gidakop base sa warrant of arrest nga gi-isyu sa Regional Trial Court Branch 16 sa Cebu City alang sa kasong Murder niadtong Abril 25, 2025. Walay pyansa nga girekomendar alang sa iyang temporaryong kagawasan. Ang suspetsado kasamtangang naa sa Cebu City Jail diin nag-atubang usab sa ubang mga kaso.
Gisiguro sa kapulisan nga napahibalo ang akusado sa iyang mga legal nga katungod.
Si PCOL Enrico E. Figueroa, Acting City Director sa Cebu City Police Office, mipasidungog sa dedikasyon ug sakripisyo sa mga sakop sa City Mobile Force Company. Gihangyo usab niya ang tanang kapulisan nga padayon nga palig-onon ang operasyon sa pagdakop sa mga wanted aron mapadayon ang kalinaw ug seguridad sa syudad.
Source: CCPO
I via Renante Socia Lada